Hunza 24/7

28/04/2026

گلگت : تھانہ ایئرپورٹ گلگت کی پولیس نے دو ملزمان کو گرفتار کرکے مغوی کو بحفاظت بازیاب کرالیا۔گزشتہ شپ تقریباً 4:30 بجے مسمی سکنہ پنجاب حال مقیم یادگار محلہ گلگت کے اغوا کی رپورٹ موصول ہوئی۔ جس پر مقدمہ علت نمبر 49/026 بجرائم 392، 457، 365، 34 ت پ درج کرکے مغوی کی تلاش شروع کی گئی۔ جس کے بعد پولیس نے خومر اور نگر سے تعلق رکھنے والے دو ملزمان کو گرفتار کر لیا جبکہ ان کے قبضے سے مغوی کو بحفاظت بازیاب کرالیا۔ پولیس نے مسروقہ 4 موبائل فونز بھی برآمد کرلئے۔ ملزمان سے مزید تفتیش جاری ہے جبکہ اہم انکشافات متوقع ہیں۔

28/04/2026

گلگت : نگراں وزیر اعلیٰ گلگت بلتستان جسٹس ریٹائرڈ یار محمد اور چیف الیکشن کمشنر گلگت بلتستان راجہ شہباز خان (تمغہ شجاعت) کی زیر صدارت آئندہ عام انتخابات 2026 کی تیاریوں کے حوالے سے ایک اہم اجلاس منعقد ہوا۔ اجلاس میں تمام نگران وزراء،ترجماں صوبائی نگران حکومت چیف سیکریٹری گلگت بلتستان ارشد مجید مہمند،پرووینشل الیکشن کمشنر عابد رضا اور دیگر متعلقہ سیکریٹریز نے شرکت کی جبکہ تمام اضلاع کے آر اوز بذریعہ ویڈیو لنک شریک ہوئے۔

اجلاس میں الیکشن کمیشن گلگت بلتستان کی جانب سے آنے والے عام انتخابات کے انعقاد کے حوالے سے تفصیلی بریفنگ دی گئی جس میں مجموعی تیاریوں، انتخابی عمل کے مختلف مراحل، مالی و انتظامی امور، لاجسٹکس، سیکیورٹی انتظامات، قانون و امن کی صورتحال اور ادارہ جاتی ہم آہنگی کے پہلوں کا جامع جائزہ لیا گیا۔ اس موقع پر اس امر کا اعادہ کیا گیا کہ انتخابات کے انعقاد کے تمام انتظامات الیکشن ایکٹ 2017 کے تحت اور اس کے دائرہ کار میں رہتے ہوئے مکمل کیے جائیں گے اور تمام متعلقہ محکمے اپنی ذمہ داریاں بروقت اور موثر انداز میں سرانجام دیں گے۔

اجلاس میں اس بات پر بھی زور دیا گیا کہ انتخابی تیاریوں کا ایک جامع اور واضح پلان تشکیل دیا جا چکا ہے جس میں تمام محکموں کی ذمہ داریوں کا تعین اور ٹائم لائنز شامل ہیں جبکہ ضلعی انتظامیہ کی جانب سے پولنگ اسٹیشنز، عملے، ٹرانسپورٹ اور دیگر ضروری سہولیات کی فراہمی کے حوالے سے اقدامات کا جائزہ لیا گیا۔ پیش رفت کی موثر نگرانی کے لیے مانیٹرنگ میکانزم قائم کیا گیا ہے تاکہ پولنگ ڈے تک تمام امور کی بروقت تکمیل یقینی بنائی جا سکے۔
مالی، انتظامی اور لاجسٹک معاونت کے حوالے سے اجلاس کو آگاہ کیا گیا کہ متعلقہ محکموں کے ساتھ قریبی رابطہ قائم ہے اور فنڈز کے بروقت اجراء اور وسائل کی دستیابی کو یقینی بنایا جا رہا ہے جبکہ ممکنہ رکاوٹوں کے فوری ازالے کے لیے ہدایات جاری کی گئیں تاکہ انتخابی عمل میں کسی قسم کی تاخیر یا خلل پیدا نہ ہو۔ قانون و امن کی صورتحال کے حوالے سے تمام اضلاع خصوصاً حساس علاقوں کا تفصیلی جائزہ لیا گیا اور متعلقہ اداروں کو ہدایت دی گئی کہ وہ پیشگی حفاظتی اقدامات، انٹیلی جنس شیئرنگ اور مربوط حکمت عملی کے ذریعے امن و امان کو برقرار رکھیں۔ سیکیورٹی اداروں کو پولنگ اسٹیشنز، انتخابی مواد کی ترسیل اور رزلٹ کمپائلیشن کے مراحل کے لیے جامع سیکیورٹی پلانز تشکیل دینے، ریہرسل کرنے اور ہنگامی صورتحال سے نمٹنے کے لیے تیار رہنے کی ہدایت کی گئی۔
اجلاس میں مختلف محکموں کے مابین مربوط کوآرڈینیشن کے فروغ پر بھی زور دیا گیا اور ہدایت کی گئی کہ ایک موثر کنٹرول روم اور رابطہ نظام قائم کیا جائے تاکہ انتخابی عمل کے دوران فوری ردعمل اور بلا تعطل مواصلات کو یقینی بنایا جا سکے۔

پرنٹ، الیکٹرانک اور سوشل میڈیا کے حوالے سے بھی تفصیلی غور و خوض کیا گیا اور اس بات پر اتفاق کیا گیا کہ عوام تک درست اور بروقت معلومات کی فراہمی کو یقینی بنایا جائے گا جبکہ غلط معلومات، نفرت انگیز مواد اور غیر قانونی پروپیگنڈے کی روک تھام کے لیے موثر مانیٹرنگ میکانزم قائم کیا جائے گا۔ محکمہ اطلاعات، الیکشن کمیشن اور قانون نافذ کرنے والے اداروں کے درمیان قریبی رابطہ بڑھانے کی ہدایت کی گئی تاکہ کسی بھی غیر ذمہ دارانہ مواد کے خلاف فوری کارروائی عمل میں لائی جا سکے۔
اجلاس میں انتخابی ضابطہ اخلاق پر سختی سے عملدرآمد کو یقینی بنانے کی ہدایت کی گئی اور واضح کیا گیا کہ تمام سیاسی جماعتوں اور امیدواروں کو ضابطہ اخلاق سے آگاہ کیا جا چکا ہے جبکہ خلاف ورزی کی صورت میں بلا امتیاز کارروائی کی جائے گی۔ شکایات کے ازالے کے لیے موثر نظام بھی قائم کیا گیا ہے تاکہ شفافیت اور اعتماد کو یقینی بنایا جا سکے۔

ممکنہ ہنگامی حالات سے نمٹنے کے لیے جامع کنٹنجنسی پلانز تیار کرنے، متبادل پولنگ اسٹیشنز، مواصلاتی نظام اور ٹرانسپورٹ کے انتظامات کو یقینی بنانے اور متعلقہ اداروں کو ہر وقت الرٹ رکھنے کی ہدایت کی گئی۔

نگراں وزیر اعلیٰ گلگت بلتستان نے اس موقع پر اظہار خیال کرتے ہوئے کہا کہ حکومت الیکشن کمیشن کو مکمل طور پر سہولیات فراہم کرے گی اور تمام ادارے اجتماعی ذمہ داری کے تحت کام کرتے ہوئے عوامی اعتماد کو مزید مضبوط بنائیں گے۔ انہوں نے کہا کہ مسائل کی بروقت نشاندہی کی جائے تاکہ ان کا فوری اور مشترکہ حل نکالا جا سکے۔ انہوں نے تمام سیکریٹریز کو ہدایت دی کہ صاف، شفاف اور منصفانہ انتخابات کے انعقاد کے لیے الیکشن کمیشن کے شانہ بشانہ کام کریں اور سرکاری مشینری مکمل طور پر الیکشن کمیشن کے سپرد کی جا چکی ہے۔
چیف الیکشن کمشنر گلگت بلتستان نے نگراں وزیر اعلیٰ کے تعاون کو سراہتے ہوئے کہا کہ انتخابات کے شفاف انعقاد کے لیے موثر مانیٹرنگ نظام نافذ کیا گیا ہے اور الیکشن ایکٹ کے تحت کسی بھی خلاف ورزی پر سخت کارروائی عمل میں لائی جائے گی۔ انہوں نے سیکیورٹی اداروں کو ہدایت کی کہ وہ انتخابات کو پرامن اور غیر جانبدار بنانے کے لیے ہر ممکن اقدامات یقینی بنائیں تاکہ عوام کا اعتماد برقرار رہے۔
چیف سیکریٹری گلگت بلتستان نے کہا کہ تمام سرکاری ادارے اس قومی فریضے کو احسن انداز میں سرانجام دیں گے اور سرکاری ملازمین کو ہدایت کی گئی ہے کہ وہ سیاسی سرگرمیوں سے اجتناب کرتے ہوئے الیکشن کمیشن کے جاری کردہ ضابطہ اخلاق پر مکمل عملدرآمد یقینی بنائیں۔
صوبائی نگران وزراء نے بھی مکمل تعاون کی یقین دہانی کراتے ہوئے اس عزم کا اظہار کیا کہ تمام متعلقہ ادارے باہمی ہم آہنگی کے ساتھ کام کرتے ہوئے انتخابات کو شفاف، منصفانہ اور پرامن بنانے میں اپنا بھرپور کردار ادا کریں گے۔

28/04/2026

چلاس : تھور سری میں دہشت گردوں کے خلاف پولیس نے چھاپہ مارا۔ پولیس نے عوام سے تعاون کی درخواست کی ہے۔

28/04/2026

سکردو : سکردو ایئرپورٹ کے مرمتی کام کے باعث مرکزی رن وے 14L/32R کو جزوی طور پر بند کر دیا گیا۔ پاکستان ایئرپورٹس اتھارٹی کے مطابق رن وے روزانہ صبح 8 بجے سے دوپہر 4 بجے تک دستیاب نہیں ہوگا اور یہ بندش 28 جون تک جاری رہے گی۔ مرمتی کام میں سیل کوٹنگ، دراڑوں کی مرمت اور مارکنگ کی دوبارہ پینٹنگ شامل ہے تاکہ حفاظتی معیار بہتر بنایا جا سکے۔

28/04/2026

چلاس : چلاس کے سکول میں مبینہ طور پر پیٹ کے کیڑے کی دوائی کھلانے کی وجہ سے متعدد طلبہ کی حالت خراب ہوگئی۔ جس کے باعث انہیں ریجنل ہسپتال چلاس منتقل کیا گیا۔ ہسپتال کی ایمرجنسی میں بچوں کو فوری طور پر ابتدائی طبی امداد فراہم کی گئی۔

ڈاکٹروں کے مطابق تمام بچوں کی حالت خطرے سے باہر ہے۔
طلبہ کو جیسے ہی ہسپتال کی ایمرجنسی میں لایا گیا۔ ڈائریکٹر محکمہ صحت دیامر استور ڈویژن ڈاکٹر عبدالمبین، ایم ایس ڈاکٹر نواب ، ڈی ایم ایس ڈاکٹر نسیم اللہ ، میڈیکل سپیشلسٹ ڈاکٹر امتیاز ، ڈاکٹر انعام اللہ اور حق نواز نے تمام بچوں کا معائنہ کیا۔

27/04/2026

گلگت بلتستان اسمبلی انتخابات 2026ء ایک انتخابی حلقہ اور تین درجن امیدوار

تحریر : غلام عباس

الیکشن کمیشن گلگت بلتستان کی جانب سے07 جون 2026ء کو گلگت بلتستان اسمبلی کے انتخابات کی تاریخ کے اعلان کے بعد صوبہ بھر میں سیاسی ہلچل عروج پر ہے۔ ان انتخابات میں حصہ لینے کے لئے مختلف فکری طبقوں نے وفاقی سیاسی جماعتوں، مقامی سیاسی جماعتوں کے پلیٹ فارمز اور آزاد حیثیت سے اپنے کاغذات نامزدگی جمع کرالئے ہیں۔ ان انتخابات میں سیاسی حلقوں کے علاؤہ قومی پارٹی پاکستان استحکام پارٹی اور مقامی پارٹی گلگت بلتستان ڈیموکریٹک پارٹی کی نئی انٹری دیکھنے کو ملی۔

آپ بخوبی آگاہ ہیں کہ انتخابی عمل ملکی قوانین کے مطابق ہر پانچ سال میں ایک بار عمل میں لایا جاتا ہے لیکن سیاسی عمل اور عام عوام کے مسائل کے حل کی جدوجہد کے لئے کسی خاص وقت یا عرصے کا تعین نہیں ہوتا بلکہ سیاسی عمل ہر دن اور ہر لمحہ جاری رہتا ہے۔ سیاست کسی بھی معاشرے میں بسنے والے لوگوں کے معیار زندگی کو بہتر بنانے کے لئے عملی طور پر جہد مسلسل کا نام ہے۔ جس میں بنیادی انسانی حقوق کو یقینی بنانے کے لئے معاشرے بلخصوص متوسط طبقے کے استحصال کے خلاف اواز اٹھانا، تاکہ غریب عوام کا استحصال نہ ہو۔ معاشرے کے مسائل کو مقتدر حلقوں تک پہنچانا، آگاہی کے متعلق سرگرمیوں کو فروغ دینا جیسے عوامل شامل ہیں۔

ایسے میں تمام امیدواروں کے حوالے سے کچھ سوالات جنم لیتے ہیں۔

کیا امیدواروں نے خود احتسابی کی ہے کہ وہ اس عمل کے لئے اہل ہیں؟

امیدوار کہیں ذاتی مفادات کے حصول کے لئے تو میدان میں نہیں اترا ؟ اگر نہیں تو،
کیا عصر حاضر کے تقاضوں کے مطابق تعلیم یافتہ ہیں اور اگر ہیں تو وہ تعلیمی قابلیت و اہلیت رکھتے ہیں؟

اگر تعلیم یافتہ ہیں تو کیا سیاسی بصیرت اور فہم و فراست رکھتے ہیں؟

اگر سیاسی فہم رکھتے ہیں تو کیا تجرباتی بنیادوں پر زمینی حقائق سے آشنا ہیں؟

کیا زمینی حقائق کو صحیح معنوں میں پرکھنے اور عوامی مسائل کے ادارک کے لئے سیاسی عملی میدان میں رہے ہیں؟

امیدوار آگر کسی پارٹی سے منسلک ہے تو کیا ان کو پارٹی اور پارٹی کارکنان کی اکثریتی حمایت حاصل ہے ؟

امیدوار خواہ وہ آزاد حیثیت میں ہو یا کسی سیاسی جماعت سے وابستہ، تو کیا ان کو عوامی حمایت حاصل ہے؟

کہیں ایسا تو نہیں کہ وہ عوامی خدمت کے نام پہ کسی موزوں، لائق اور قابل امیدوار کی راہ میں رکاوٹ تو نہیں بن رہا؟

کہیں ایسا تو نہیں کہ عوامی خدمت کے نام پر امیدوار خود نمائی کے لئے میدان میں اترا ہو؟
کیا الیکشن لڑنے کے لئے متعلقہ امیدوار کے پاس مناسب معاشی صلاحیت موجود ہے؟

اگر کو ئی امیدوار مذکورہ بالا خصوصیات کے حامل ہے تو انہیں ضرور انتخابات میں حصہ لینا چاہیئے تاکہ انہیں سیاست کے میدان کے پیچ و خم کا پتہ چلے۔ اگر کوئی صاحب ان صلاحیتوں سے عاری ہے تو انہیں الیکشن کے نام پر بلاجواز قابل اور موزوں امیدوار کے چناؤ میں رکاوٹ نہیں بننا چاہیئے۔ گو کہ انتخابات میں حصہ لینے کا حق ہر شہری کو حاصل ہے۔ بہرحال تمام امیدواروں کو اپنے حلقے کے بہتر مفاد کا خیال رکھنا بھی انہی کی ہی ذمہ داری ہے۔ اگر انتخابات کے نام پر ہنزہ یا کوئی اور حلقہ قابل لیڈر سے محروم ہوجاتا ہے تو اس زیادتی میں وہ تمام امیدوار برابر کے شریک ہیں جو سمجھتے ہوئے بھی قابل لیڈر کو آگے آنے نہیں دیتے۔ ہنزہ میں بھی آئندہ انتخابات کے لئے درجنوں امیدوار میدان میں ہیں۔ یہ وقت ہے کہ ہنزہ کی بہتری کی خاطر موزوں،قابل اور سیاسی طور پر بالغ کسی لیڈر کو آگے آنے اور ہنزہ کی خدمت کرنے کا موقع دیا جائے۔ نہیں تو پہلے کی طرح آئندہ بھی پانچ سال ہاتھ ملتے رہنا پڑے گا۔

27/04/2026

ہنزہ نیوز کی جانب سے گلگت میں نئے آفس کا افتتاح

گلگت: ہنزہ نیوز نے گلگت شہر میں اپنے جدید سٹوڈیو کا باضابطہ افتتاح کردیا۔ اس سلسلے میں مقامی نجی ہوٹل میں ایک پروقار تقریب کا انعقاد کیا گیا۔ جس میں گلگت بلتستان کی تمام سیاسی جماعتوں کے عہدیداران، سول سوسائٹی کے نمائندگان، سینئر سرکاری افسران، عسکری قیادت اور صحافی برادری کی بڑی تعداد نے شرکت کی۔

27/04/2026

گلگت : گلگت بلتستان پولیس نے سنسنی خیز مقابلے کے بعد گلگت بلتستان سکاؤٹس بی کو شکست دے دی۔ جس کی خوشی میں پولیس اہلکار رقص کا مظاہرہ کررہے ہیں۔

27/04/2026

گلگت ایس او پیز کی خلاف ورزی پر چائنیز ترجمان گرفتار

گلگت : تھانہ جوٹیال کی پولیس نے کارروائی کرتے ہوئے ایس او پیز (SOPs) کی خلاف ورزی پر ایک چائنیز ترجمان کو زیرِ دفعہ 11 گلگت بلتستان ٹیمپریری ریزیڈنس ایکٹ 2026 کے تحت گرفتار کر لیا۔ ملزم کو عدالتی حکم پر جیل منتقل کر دیا گیا۔

27/04/2026

گلگت : بجلی کی غیرمنصفانہ تقسیم کے خلاف گلگت سینما چوک پر احتجاجی مظاہرہ کیا گیا۔

27/04/2026

26/04/2026

ہنزہ : رہبر معظم سید علی خامنہ ای اور ان کے باوفا جانثاران کے چہلم کے حوالے سے گنش امامیہ کمپلیکس میں تقریب کا انعقاد کیا گیا۔ جس سے قائد ملت جعفریہ گلگت بلتستان سید راحت حسین الحسینی ،سید عاشق حسین ،شیخ شرافت حسین ،شیخ موسی کریمی ،شیخ مقبول حسین ،شیخ صداقت حسین اور دیگر علمائے کرام نے خطاب کیا۔ تقریب کے اخر میں ہنزہ گنش کے مومنین کی جانب سے اسلامی جمہوریہ ایران کے لیے نکالی گئی۔ عطیہ اسی لاکھ روپے قائد ملت جعفریہ گلگت بلتستان سید راحت حسین الحسینی کے حوالے کیا۔